從投資中更認識自己 | 資深外匯評論員 - 陳健豪
短篇分享
作者介紹: 陳健豪 Aaron Chan
- 外匯小王子
- 愛跑數更愛跑步的金融人
- 金融跑隊 Just Runners 成員
- 財星足
文章獲授權後轉載自 Aaron FB page: https://www.facebook.com/AaronChanFX
一向買股票都好 old school 有用 Excel 做記錄既習慣，記低買入賣出日期、股票號碼、股數、買入賣出價、成本、賺蝕金額、股息、賺蝕百分比等。
睇返記錄，對上一次入市原來就係上年7月撈過騰訊 ($432) 同京東 ($240)，之後股價反彈過去 $49x 同 $330。好彩3月初同星期一、二都選擇貪婪，都有少少甜頭，每次大跌市都引起我興趣想湊熱鬧。
經歷過咁刺激既既一星期，大家又學到啲咩？睇留言有人話學識邊個財演呃飯食，又忍唔住想講兩句。係呢一刻仍然將責任怪人唔係檢討自己既不足，只證明
1. 自己無戰勝市場既能力喎師兄
2. 亦未揀啱一個同你投資風格相近既財演
我學識更認識自己
1. 對別人仁慈就係對自己殘忍:
呢兩年做少左節目，因為做資料蒐集 (收集、整理、篩選、消化)已經好唗時間，仲要組織同表達、做節目前既交通( 或 zoom setup 都要 5-10分鐘前 standby)，但得到既如果係惡意留言，唔通為左賺可能有可能無既出鏡費咩，不如係市場上自己搵，對別人仁慈就係對自己殘忍。
2. 齊上齊落:
平時睇外圍消息已經好費精神，無時間再研究個股，所以我清楚知道自己揀股能力弱。上年年初入市密，因為市場氣氛旺，咩板塊都升; 年中撈底，因為咩板塊都跌。今次都一樣，市況受外圍消息影響同一面倒就最適合我自己操作。
3. 投資組合:
當然我個股票組合無可能無損失，不過大部分都係有收息成份既核心組合，例如內銀煎釀三寶中工建，由 IPO 大大話話揸左十幾年，低又買啲高又放少少，今次跌到殘又咁啱有舊閒錢，都係時候又整理同強化一下個長線投資收息嗰部份。
4. 必先利其器:
最鐘意快上快落、速戰速決既市場，別人恐懼時貪婪，但對於幾時先最恐懼既拿捏，股票市場仍未係我最熟悉(因為我無用 live streaming 報價，唔習慣排隊，習慣市價即做)，結果第一注都早左幾日。外匯市場相對行得慢，放定限價盤同有即市圖表配合，仍然係自己最熟悉市場。
5. 戒賭熱線1834633 🤣🤣
投資市場有唔同門派，賺到錢就係叻啦，每一次大屠殺最重要、最值錢既係檢討自己既不足，而唔係滿足於一次半次既勝利。
#Aaronchan #陳健豪 #FX #Forex #外匯
風險提示: 本文章純屬趣味分享不代表本網站立場。內容發佈的資料包括所有觀點、新聞、分析、報價或其它信息僅為一般市場評論，並非構成投資建議，也並非勸誘或推薦閣下買入或賣出任何保證金貴金屬金融產品。
